Como a XA! nace fundamentalmente contra a prohibición das sustancias psicoactivas, a información desta sección estará centrada na denuncia da actual situación de ilegalidade xa que como resultado desta veñen os verdadeiros problemas relacionados coas drogas:
– descoñecemento das sustancias por parte dos consumidores o que leva a prácticas de risco asociadas ao consumo.
– a adulteración, por estar as sustancias ilegais en mans de grupos criminais e persoas co único obxectivo de beneficio máximo.
– problemas sociais, corrupción e vulneración dos Dereitos Humanos tanto nas zonas de produción como nos lugares de distribución.
– problemas medioambientais en zonas produtoras, tanto no cultivo -para o que se precisan moitas hectáreas que hai que deforestar- como no procesado -residuos químicos que son verquidos a ríos sen ningún tipo de tratamento-. Todo isto, ademais, sucede normalmente en espazos naturais inaccesibles que deberían estar protexidos. Tamén por parte dos perseguidores dos cultivos, EEUU e os seus secuaces, que co pretexto de erradicación fan fumigacións indiscriminadas con produtos tan prexudiciais como o Paracuat, que destrúen ecosistemas e acaban coa saúde dos habitantes da rexión.
Nesta sección iremos subindo textos que analizan o moderno experimento da prohibición dende a súa orixe ata as súas consecuencias.
A Xuntanza Antiprohibicionista 